Thu a sawinaah Chief Minister chuan, Prof RL Thanmawia hi lehkhabu chi hrang hrang ziak thin, a lehkhabute pawh High School atanga University thlenga zirlaibu atana an hman thin a ni a. A hnathawh ropui tak tak te avangin India sawrkar chuan Padma Shree chawimawina a lo hlan tawh a, Mizoramah Academy Award te, Literary Award te, Pu Buanga Award te pawh a lo dawng tawh a. Vawiinah lehkhabu ropui tak dang min rawn hlui leh ta a ni. Chhura chanchin kan hriat dan tlang lawn hi chu lak khawm harsa a nih a rinawm loh va. Nimahsela, kan zo hnahthlak hnam hrang hrang ten Chhura chanchin an hriat dan leh an inhlanchhawn dan rintlak tak han lakkhawm erawh chu a hautak hlein ka ring. Hun pawh a duh rei ang. Harsa mahse a pawimawhzia hriain a bei hram hram a, a lo puitling ta a ni, a ti.

Chhura chanchin hian Zofate hi hnam khat kan nihzia min hrilh a, hnam bil tawngte a danglam hlek hlek angin a hming pawh a lo danglam hlek hlek chauh a ni. He lehkhabu hi zofate inpumkhatna kawngah a tangkai dawn a, mi tinin neih theuh tum ila a lawmawm ngawt ang, a ti a. Kan duh vang ni lovin zofate hi ram pathumah thendarhin kan awm a, ramriin min daidang mah se hnam ri erawh chu kham theih a ni lo, inngeih takin i awm del del ang u. Chutianga awm tur chuan Chhura hian min zirtira, min lo huikhawm daih tawh a ni, a ti.

Chief Minister chuan, zofate hnam tobul chhuichhuaha, sawrkar pawmpui leh mipuite pawm tlan neih tul kan ti a. A bultantu tur kan insiam chho mek a. Sawrkar hian zofate tobul leh kan inpumkhatna hi kan ngaipawimawh hle a ni, a ti bawk.

Lehkhabu ziaktu Prof RL Thanmawia, pawhin thusawiin lehkhabu 37 ka lo buaipui ve tawh zingah Chhura lehkhabu hi a hautak ber pawl niin ka hria a. Hnam peng hrang hrangten anmahni tawnga ziaka han dah fel thlip thlep te an lo nei lo va, hnam peng sawm thum velin Chhura chanchin hi kan nei niin ka hria a, chung zinga hnam 16 vel te thawnthu chauh chu tunah hian ka la lakhawm thei rih a ni. Pathian zarah kan la tihbelh zel thei turah ngai ang, tiin lehkhabu a buatsaih dan a sawi a. Tanpuitu a neihte hming lamin, an chungah lawmthu a sawi a ni.

Lehkhabu thlirlawkna hi Dr. H. Laldinmawia, Chairman, Chhura Committee chuan a nei a, Chhura Hla Hril - PC Lalnunmawii, Research Scholar-in a sawi a, PUC BA IV Semester zirlaiten Chhura hla an sa a, F. Vanlalrochana'n lawmthu sawiin, Rev VL Luaia Hranleh, Sr. Executive Secretary, Mizoram Synod chuan malsawmnain inkhawm a khar a ni.